បែកធ្លាយព័ត៌មាន បឹងកេត ត្រៀមយក គ្រូបង្វឹក ជនជាតិថៃ មកជំនួសកៅអី គ្រូបង្វឹកអូស្ដ្រាលី

យោងតាមប្រភពព័ត៌មាន ក្រៅផ្លូវការមួយ កាលពីថ្ងៃទី០៥ ខែកុម្ភៈ ឆ្នាំ២០១៥ បានទម្លាយឲ្យដឹងថា ក្លឹបបឹងកេតអង្គរ ត្រៀមនឹងអញ្ជើញ គ្រូបង្វឹកជនជាតិថៃលោក Aphisit ImAmphai មកដឹកនាំក្រុមជំនួសកៅអី របស់លោក John Mcglynn ដែលទើបចែកផ្លូវ ជាមួយក្លឹបបឹងកេត កាលពីពេលថ្មីៗ កន្លងទៅ ។

ប៉ុន្ដែបើតាមការអះអាង របស់ប្រិយមិត្តនិយម លេងបណ្តាញទំនាក់ទំនងសង្គម Facebook និងជាអ្នកគាំទ្រវិស័យកីឡា បាល់ទាត់កម្ពុជា ផ្កាប់មុខផងនោះ គឺច្បាស់ការ ១០០%តែម្ដង ដែលក្លឹបទើបប្ដូរឈ្មោះ ពីក្រុមចម្ការកៅស៊ូបឹងកេត ទៅជាក្លឹបបឹងកេតអង្គរនេះ នឹងតែងតាំងលោក Aphisit ImAmphai ធ្វើជាគ្រូបង្វឹក ដើម្បីដឹកនាំក្លឹបត្រៀម ចូលរួមប្រកួតក្នុងព្រឹត្តិការណ៍បាល់ទាត់ លីកកំពូលកម្ពុជា រដូវកាលថ្មី ដែលនឹងចាប់ផ្ដើម នៅខែមីនា ខាងមុខនេះ ។

ទាក់ទងនឹងបញ្ហានេះ អ្នកចាត់ការទូទៅក្នុង ក្លឹបបឹងកេតអង្គរលោក បែ មករា បានឲ្យដឹងថា ពេលនេះក្លឹបនៅមិនទាន់ កំណត់ពីគ្រូបង្វឹកថ្មី ដែលត្រូវជំនួសតំណែង គ្រូបង្វឹកជនជាតិអូស្ដ្រាលីលោក John Mcglynn នៅឡើយទេ ប៉ុន្ដែក្លឹបគ្រាន់តែសម្លឹក រកអ្នកមានសមត្ថភាពម្នាក់ មកដឹកនាំក្លឹបក្នុង រដូវកាលថ្មីប៉ុណ្ណោះ ។

លោក បែ មករា បានបញ្ជាក់យ៉ាងដូច្នេះថា «ការសម្រេចជ្រើសរើស គ្រូបង្វឹកថ្មី គឺជាតួនាទី របស់គណៈកម្មការ ប្រតិបត្តិ ដែលត្រូវពិភាក្សាគ្នា រកគ្រូបង្វឹកណា ដែលមានសមត្ថភាព អាចដឹកនាំក្លឹបបាន ហើយក៏រកឲ្យបានលឿន បំផុតផងដែរ ក្នុងពេលដែលក្លឹបមិនទាន់ មានគ្រូបង្វឹកនោះ ។ ចំពោះគ្រូបង្វឹកថ្មី ដែលក្លឹបត្រូវ ជ្រើសរើសនោះ គឺនៅមិនទាន់មានសញ្ញាណ ច្បាស់លាស់ឡើយ ទាំងលោក Aphisit ImAmphai ដូចអញ្ចឹងដែរ គឺអ្វីៗស្ថិតនៅលើការសម្រេច របស់គណៈកម្មការប្រតិបត្តិថា ត្រូវយកអ្នកណា មកដឹកនាំក្រុមក្នុងយុទ្ធនាការ ពានរង្វាន់លីកកំពូល ដែលនឹងចាប់ផ្ដើម នៅខែមីនាខាងមុខ» ។

ទោះបីជាយ៉ាងណា ប្រភពព័ត៌មានមិនច្បាស់ការនេះ ក៏មានការគាំទ្រច្រើន ពីអ្នកគាំទ្រវិស័យ កីឡាបាល់ទាត់ផងដែរ ប្រសិនបើក្លឹបបឹងកេតអង្គរ ជ្រើសរើសយកលោក Aphisit មកដឹកនាំមែននោះ ព្រោះគ្រូបង្វឹកជនជាតិថៃរូបនេះ ក៏ធ្លាប់ជួយឲ្យក្លឹបភ្នំពេញក្រោន លើកពាន League កំពូលកម្ពុជាចំនួន ២លើកផងដែរ ។

អ្វីដែលធ្វើឲ្យគេហ៊ាន អះអាងថា បឹងកេត នឹងជ្រើសរើសលោក Aphisit ធ្វើជាគ្រូបង្វឹកនោះ គឺដោយសារ ស្របពេលជាមួយនឹង ក្លឹបបឹងកេត បានទិញកីឡាករជនជាតិ នីហ្សេរីយ៉ា ចំនួន២រូប ពីក្លឹបបាល់ទាត់ល្បីមួយ នៅប្រទេសថៃ កាលពីសប្ដាហ៍មុន គឺមានកីឡាករ Oyewole Yemi Joseph និងកីឡាករ Esoh Paul Omogba ។ ហេតុដូច្នេះហើយ ទើបគេហ៊ានទស្សន៍ទាយថា បឹងកេត ច្បាស់ជាយកគ្រូបង្វឹកថៃ មកដឹកនាំបន្ដពីលោក John បែបនេះ ។

ទោះជាយ៉ាង នេះគ្រាន់តែព័ត៌មាន ក្រៅផ្លូវការតែប៉ុណ្ណោះ ដូចនេះមានតែរងចាំមើល ទាំងអស់គ្នាប៉ុណ្ណោះ ទើបដឹងថា តើបឹងកេតអង្គរ ត្រូវជ្រើសយកលោក Aphisit មកដឹកនាំ ឬក៏យកគ្រូផ្សេងនោះ?