តម្លៃខ្លួនកីឡាករ ១០ រូប ដែលមានតម្លៃ ថ្លៃជាងគេបំផុត ប្រចាំឆ្នាំ ២០១៥នេះ

១. Lionel Messi កីឡាករខ្សែប្រយុទ្ធ លំដាប់លេខ១ របស់ក្លឹបអេស្ប៉ាញ FC Barcelona បានឈរនៅលើគេចំណាត់ ថ្នាក់លេខ១ដែលមាន តម្លៃរហូត ដល់ ២៦២លានដុល្លារអាម៉េរិក ។ ខ្សែប្រយុទ្ធជនជាតិអាហ្សង់ទីន វ័យ២៧ឆ្នាំរូបនេះ បានចូលលេងឲ្យក្លឹប អ្នកមានបុណ្យតាំង ពីយុវជនមក ម្ល៉េះក្នុងឆ្នាំ២០០០ និងចូលលេងក្នុងឈុតធំក្នុងឆ្នាំ២០០៤ ហើយក៏ជាអ្នករកគ្រាប់បាល់ឲ្យក្លឹបមួយនេះបានច្រើនជាងផងដែរទាំងលេងនៅ La Liga និង UEFA Champions League ក្រៅពីជួយឲ្យក្លឹបយក្សមួយនេះឈ្នះពានផ្សេងៗរាប់មិនអស់ហើយនោះ ។

២. Cristiano Ronaldo កីឡាករខ្សែប្រយុទ្ធលេខ១របស់ក្លឹបស្តេចស Real Madrid បានឈរនៅចំណាត់ថ្នាក់លេខ២ ដែលមានតម្លៃខ្លួន ១៥៨លាន ដុល្លារ ។ Ronaldo បានជួយឲ្យក្លឹបអេស្ប៉ាញមួយនេះឈ្នះពានជាបន្តបន្ទាប់ ដែលបានធ្វើឲ្យតម្លៃខ្លួនរបស់តារាឆ្នើមវ័យ២៩ឆ្នាំរូបនេះ ប្រែប្រួលពី ១២០លានដុល្លារ រហូតដល់១៥៨លានដុល្លារក្នុងនាមជាកីឡាករដែល អាចរកគ្រាប់បាល់បំប៉ោងសំណាញ់ទីស្ទើរតែគ្រប់ការប្រកួតទាំងអស់ ។ អតីតខ្សែប្រយុទ្ធក្លឹប Man Utd រូបនេះលេងបាន ល្អណាស់ក្នុងក្លឹបអាជីព តែក្នុងក្រុមជម្រើសជាតិ ព័រទុយហ្គាល់វិញមិនទាន់ បានជួយ ឲ្យឈ្នះពានណាមួយនៅឡើយទេ តែបានជួយឲ្យព័រទុយហ្គាល់បង្ហាញខ្លួនស្ទើរតែគ្រប់កម្មវិធីមានទាំង FIFA World Cup និង UEFA Euro ជាដើម ។

៣. Eden Hazard ខ្សែបម្រើប្រយុទ្ធស្លាប ជនជាតិប៊ែលហ្ស៊ិករបស់ក្លឹបអង់គ្លេសតោខៀវ Chelsea មានតម្លៃខ្លួន១១៨ លានដុល្លារឈរនៅលេខ៣ ។ តារាវ័យ២៧ឆ្នាំ Hazard ធ្វើបានយ៉ាងល្អនៅទឹកដីថ្មីនៃកីឡដ្ឋាន Stamford Bridge បន្ទាប់ពីបានចាកចេញពីក្លឹប Lille របស់បារាំងនាចុងឆ្នាំ២០១១ និង បានជួយឲ្យ Chelsea ឈ្នះពាន Champions League លើកទី១ឆ្នាំ២០១២ នៅអាល្លឺម៉ង់ និងឈ្នះពានលំដាប់ទី២ Europa League ឆ្នាំ២០១៣ផងដែរ ។

៤. Diego Costa ខ្សែប្រយុទ្ធដើមកំណើតប្រេស៊ីល សញ្ជាតិអេស្ប៉ាញវ័យ២៨ឆ្នាំកំពុងឈរនៅលេខ៤ដែលមានតម្លៃ ខ្លួន១០០លាន ដុល្លារដែល កំពុងតែ លេងឲ្យក្លឹប Chelsea ទឹកដីអង់គ្លេស ។ ក្នុងរយៈពេល៣ឆ្នាំចុងក្រោយនេះ អតីត ខ្សែប្រយុទ្ធក្លឹបអេស្ប៉ាញ Atletico Madrid រូបនេះលេង ឡើងជើងជាខ្លាំង ក្រៅពីបានជួយឲ្យក្លឹបនេះឈ្នះពាន La Liga រដូវកាលមុន និងរងជើងឯកពាន Champions League ដូចគ្នា នៅមុនពេល បានផ្លាស់ ចេញពីក្លឹបអេស្ប៉ាញ មកលេងនៅទឹកដីអង់គ្លេសវិញនោះ ។

៥. Paul Pogba កីឡាករខ្សែបម្រើជនជាតិបារាំង ដែលកំពុងប្រកបអាជីពនៅក្នុងក្លឹបជើងឯកអ៊ីតាលីសេះបង្កង់ Juventus ឈរនៅលេខ៥ ដែលមាន តម្លៃ ខ្លួន៨៦លានដុល្លារ ។ អតីតកីឡាករក្លឹបអង់គ្លេស Manchester United រូបនេះបានបង្ហាញថ្វីជើងដ៏គួរឲ្យចាប់អារម្មណ៍នៅក្នុង World Cup លើកទី២០ ឆ្នាំ២០១៤ ក្រៅពីបានជួយឲ្យ Juventus ឈ្នះពាន Serie A ៣សម័យកាលជាប់គ្នាក្រោមការដឹកនាំរបស់លោក Antonio Conte ។

៦. Sergio Aguero កំពូលកីឡាករខ្សែប្រយុទ្ធរបស់ក្លឹបមេឃខៀវ Manchester City ដែលមានតម្លៃខ្លួន៧៧លាន ដុល្លារឈរនៅលេខ៦ ហើយក៏ជាកីឡាករ ដែលកំពុងនាំមុខគេដាច់ពីការបំប៉ោងសំណាញ់ទីបាន១៦គ្រាប់ច្រើនជាងគេ ផងដែរនៅ Premier League នារដូវកាលថ្មីឆ្នាំ២០១៤-២០១៥នេះ ។ កីឡាករអាហ្សង់ទីន វ័យ២៧ឆ្នាំ Aguero រូប នេះបានជួយឲ្យ Man City ឈ្នះជើងឯក Premier League បាន២សម័យកាលនាអំឡុង ឆ្នាំ២០១២ និង ២០១៤ ក្រៅពីបាននាំអាហ្សង់ទីនឈានមកដល់វគ្គផ្តាច់ព្រ័ត្រនៃ World Cup 2014 នៅប្រទេសប្រេស៊ីល ដែលបានចាញ់អាល្លឺម៉ង់នៅនាទីបន្ថែម ។

៧. Raheem Sterling ខ្សែប្រយុទ្ធវ័យក្មេងជនជាតិអង់គ្លេសមានតម្លៃខ្លួន ៧៥លានដុល្លារ ដែលកំពុងលេងឲ្យក្លឹបក្នុង ស្រុកហង្សក្រហម Liverpool ។ ខ្សែរ ប្រយុទ្ធវ័យ២៤ឆ្នាំរូបនេះធ្វើបានយ៉ាងល្អកាលពីរដូវកាលឆ្នាំ២០១៣-២០១៤ដែល បានជួយឲ្យក្លឹបហង្សរងជើងឯក Premier League និងឈ្នះកៅអីលេងនៅ Champions League រដូវកាលនេះដែរ មុនពេលធ្លាក់ជើងនៅដើមរដូវកាលនេះ ។

៨. Cesc Fabregas កីឡាករខ្សែមប្រើប្រយុទ្ធរបស់ក្លឹប Chelsea មានតម្លៃខ្លួន៧៤លានដុល្លារដែល កំពុងកាក់កបយ៉ាងខ្លាំងក្នុងក្លឹបអង់គ្លេស ក្រោយពេលដែល បានចាកចេញពីក្លឹបទឹកដីកំណើត FC Barcelona នៅមុនរដូវកាលថ្មីចាប់ ផ្តើម ។ កីឡាករវ័យ២៩ឆ្នាំរូបនេះលេងឡើង ជើងគួរឲ្យកត់សម្គាល់តាំងពីលេងក្នុងក្លឹប កាំភ្លើង ធំ Arsenal ម្ល៉េះ ហើយក៏ កំពុងតែជួយឲ្យ Chelsea ឈរនៅកំពូលតារាងដាច់ផងដែរដោយចាប់ដៃគូជាមួយនឹង Diego Costa ។

៩. Alexis Sanchez កីឡាករខ្សែប្រយុទ្ធជនជាតិឈីលីមានតម្លៃខ្លួន៧៣លានដុល្លារកំពុងលេងឲ្យក្លឹប Arsenal ក្រោយពេលបានចាកចេញពីក្លឹប Barcelona នៅមុនរដូវកាលថ្មីចាប់ផ្តើម ពោលគឺនៅក្រោយពេលបញ្ចប់ World Cup 2014 ដែលបានជួយឲ្យឈីលីឡើងមកដល់វគ្គ១៦ក្រុមចុងក្រោយទៀត ។ Sanchez បានវិវត្តន៍ខ្លួនស្ទើរតែជាកីឡាករ លេខ១ប្រចាំក្លឹបថ្មី Arsenal ទៅហើយជាមួយនឹងការបង្ហាញទម្រង់លេងដ៏អស្ចារ្យនៅកីឡដ្ឋាន Emirate ។

១០. Gareth Bale កីឡាករខ្សែបម្រើប្រយុទ្ធក្លឹប Real Madrid មានតម្លៃខ្លួន៧១លានដុល្លារអាម៉េរិក ។ កីឡាករជនជាតិ វ៉េលវ័យ២៧ឆ្នាំរូបនេះបានផ្លាស់ មក លេងនៅទឹកដីអេស្ប៉ាញកាលពីឆ្នាំ២០១៣ និងបានជួយឲ្យក្រុមស្តេចសមួយនេះ ឈ្នះពាន៤ផងដែររហូតមកទល់ពេលនេះរួមមាន Champions League, Copa del Rey, FIFA Club World Cup និង UEFA Super Cup ៕