កិត្តិនាមរបស់ Tottenham Hotspur ក្នុងនាមជាក្លិបដែលផ្តល់ភាពរំភើបការប្រកួតជម្រុះផ្សេងៗ បានរងនូវការប្រេះស្រាំតាមរយៈការធ្លាក់ចេញពីការប្រកួតពាន FA Cup ក្រោមស្នាដៃក្រុម Leicester កាលពីចុងសប្តាហ៍ ប៉ុន្តែ ក្រុមរបស់លោក Mauricio Pochettino កំពុងតែស្ថិតនៅលើផ្លូវឆ្ពោះទៅកាន់ការឈានទៅប្រកួតដណ្តើមពាន League Cup វគ្គផ្តាច់ព្រ័ត្រដើម្បីជួបជាមួយនឹងក្រុម Chelsea។
ក្រុម Sheffield United ដែលស្ថិតក្នុងក្របខ័ណ្ឌលំដាប់ទី៣ នឹងត្រូវរង់ចាំនៅលើទឹកដីរបស់ពួកគេ ហើយក្រុម Spurs នឹងធ្វើដំណើរទៅកាន់ទីក្រុង Yorkshire ដើម្បីធ្វើការប្រកួតជើងទី២វគ្គពាក់កណ្តាលផ្តាច់ព្រ័ត្រនៅថ្ងៃពុធនេះជាមួយនឹងការនាំមុខ ១-០ ពីការប្រកួតក្នុងពេលដែលក្រុមទាំងពីរបានជួបគ្នានៅភាគខាងជើងទីក្រុងឡុងដ៍។
Spurs បានឈ្នះពានរង្វាន់ League Cup សរុបចំនួន៤លើក និងបានឈានទៅប្រកួតវគ្គផ្តាច់ព្រ័ត្រចំនួន៣លើកក្នុងរយៈពេលត្រឹមតែ១ទសវត្សរ៍ ក្រោយពីបានផ្តួលក្រុម Chelsea កាលពីឆ្នាំ២០០៨ បន្ទាប់មកបានចាញ់ក្រុម Manchester United ដោយការស៊ុតបាល់ប៉េណាល់ទីនាឆ្នាំបន្ទាប់នោះ និងបានចាញ់ក្នុងការប្រកួតវគ្គផ្តាច់ព្រ័ត្រក្រោមស្នាដៃក្រុម Blackburn Rovers កាលពីឆ្នាំ២០០២។
ការឈានទៅប្រកួតនៅកីឡដ្ឋាន Wembley ជាមួយនឹងក្រុម Chelsea ដែលបានឈ្នះ ១-០ លើក្រុម Liverpool កាលពីថ្ងៃពីយប់មិញ កំពុងតែរង់ចាំសម្រាប់ក្រុមឈ្នះពីការប្រកួតនៅឯកីឡដ្ឋាន Bramall Lane ហើយលោក Pochettino ពិតជាចង់ឲ្យកីឡាកររបស់លោកបំភ្លេចការខកចិត្តដោយសារតែបរាជ័យក្រោមស្នាដៃក្រុម Leicester និងត្រូវដណ្តើមយកឱកាសនេះឲ្យបាន។
គ្រូបង្វឹកសញ្ជាតិអាហ្សង់ទីនរូបនេះបានឲ្យដឹងថា៖ «វាសំខាន់ណាស់ក្នុងការរក្សានូវការលើកទឹកចិត្តលើខ្លួនឯង និងការជឿជាក់របស់យើង ពីព្រោះយើងចាំបាច់ត្រូវតែលេងនៅថ្ងៃពុធនេះជាមួយនឹងការទម្រង់លេងដ៏ល្អបំផុតរបស់យើង។ វានឹងក្លាយជាការប្រកួតដ៏ស្វិតស្វាញមួយ។
អ្នកចាំទី Michel Vorm បានចូលលេងក្នុងការប្រកួតដណ្តើមពានជា Cup ក្នុងស្រុក ខណៈដែលអ្នកចាំទីជម្រើសទី១ Hugo Lloris របស់ Spurs ចង់លេងក្នុងការប្រកួតក្របខ័ណ្ឌ Premier League និង Europa League ជាង ខណៈយុទ្ធនាការលំដាប់ទី២ប្រចាំទ្វីបអឺរ៉ុបមួយនេះ នឹងចាប់ផ្តើមប្រកួតឡើងវិញនៅខែក្រោយ។ អ្នកចាំទីសញ្ជាតិហូឡង់ Vorm បានធ្វើឲ្យមានកំហុសជាច្រើនដែលនាំឲ្យ Leicester អាចរកគ្រាប់បាល់ឈ្នះកាលពីថ្ងៃអាទិត្យ ប៉ុន្តែ វានៅតែមិនច្បាស់ថា តើរូបគេនឹងរក្សាតំណែងរបស់គេ ឬយ៉ាងណាឡើយ។
បើគិតចាប់តាំងពីឆ្នាំ២០០៦ ក្រុមទាំងពីរធ្លាប់ជួបគ្នាបីលើក ខណៈដែលក្រុម Tottenham បានកត់ត្រាជ័យជម្នះ២លើក និងចាញ់១លើក ហើយការជួបគ្នាលើកចុងក្រោយក្នុងឆ្នាំ២០១៥ Spurs បានយកឈ្នះ ១-០៕
Post a Comment