អ្នកចាំទី David De Gea ត្រូវបានគេរាយការណ៍ថាបានបន្តកុងត្រា៥ទៀត ដើម្បីនៅបន្តជាមួយនឹងក្រុមបិសាចក្រហម Manchester United។
ប៉ុន្មានសប្ដាហ៍ចុងក្រោយនេះ Man Utd បានព្យាយាមលួងលោម De Gea ឲ្យចុះកិច្ចសន្យាថ្មីទៀត ខណៈដែលក្លិបយក្សរបស់អេស្ប៉ាញ Real Madrid បានបង្កើនចំណាប់អារម្មណ៍របស់ខ្លួនកាន់តែខ្លាំងឡើងទៅលើអ្នកចាំទីវ័យ២៤ឆ្នាំរូបនេះ។កាលពីសប្ដាហ៍មុន មានពាក្យចចាមអារ៉ាមមួយថា កីឡាករជម្រើសជាតិអេស្ប៉ាញ បានព្រមព្រៀងផ្ទេរទៅកាន់ Real Madrid នៅរដូវកាលក្រោយ ប៉ុន្តែសេចក្ដីរាយការណ៍ចុងក្រោយមួយ បានឲ្យដឹងថា អ្នកចាំទីដៃស្អិត De Gea នឹងនៅបន្តក្នុងកីឡដ្ឋាន Old Trafford រហូតដល់ឆ្នាំ២០២០។ សារព័ត៌មានអ៊ីតាលី SportMediaset បានចេញផ្សាយព័ត៌មាន ដោយបង្ហោះនៅលើគេហទំព័រ Twitter របស់ពួកគេជាភាសាអ៊ីតាលី ដែលមានន័យថា៖ «Manchester United បានចុះកិច្ចសន្យាថ្មីមួយទៀត ជាមួយ De Gea និងមានសុពលភាពរហូតដល់ឆ្នាំ២០២០»។
គេជឿថាក្លិប Man Utd នឹងផ្ដល់ថ្លៃឈ្នួលដល់ De Gea ប្រមាណ ១៤ម៉ឺនផោន (ជាង២១ម៉ឺនដុល្លារ) ក្នុងមួយសប្ដាហ៍ ក្នុងកិច្ចសន្យាថ្មីនេះ៕
Post a Comment