កាំភ្លើងធំ ប្រល័យហង្សក្រហម ឡើងឈរលេខ២ ចំណែកបីសាចក្រហមតាមមក លេខ ៣ ( Video Inside )

ការប្រកួត Big Match បាល់ទាត់ English Premier League សប្ដាហ៍ទី ៣១ កាលពីយប់មិញនេះ ក្រុមកាំភ្លើងធំ Arsenal បានបំបាក់ហង្សក្រហម Liverpool ៤-១ នៅ Emirates Stadium នឹងឡើងទៅឈរនៅចំណាត់លេខ២ ក្នុងតារាងលីកកំពូលរបស់អង់គ្លេស។

ក្រុមភ្ញៀវហង្សក្រហម ដែលអវត្តមានកីឡាករសំខាន់ៗជាច្រើនដូចជា Steven Gerrard និង Martin Skrtel ដោយជាប់ពិន័យ ហើយត្រូវជំនួសដោយ Lucas Leiva និង Kolo Toure នោះ មិនបានបង្ហាញទម្រង់លេងល្អទេ ពោលគឺនៅ ៨ នាទី មុនបញ្ចប់តង់ទី១ ពួកគេរបូតគ្រាប់បាល់ឲ្យម្ចាស់ផ្ទះលត់ដល់ទៅ ៣-០ ដែលស៊ុតដោយកីឡាករវ័យក្មេង Bellerin នាទី៣៧, Özil ហ្វ្រីឃីតនាទី៤០ និង Sánchez នាទី៤៥។

ទោះយ៉ាងណា ចូលតង់ទី ២ Liverpool បានព្យាយាមវាយសម្រុកវិញ ក្រោយដូរ Sturridge ចូលជំនួស Markovic។ ហង្សក្រហម តាមបាន ១ គ្រាប់វិញ ដោយបាល់ប៉េណាល់ទី ស៊ុតដោយ Henderson នាទី៧៦ ក្រោយ Bellerin បង្កកំហុសលើ Sterling។

ប៉ុន្តែយ៉ាងណាក្ដី នៅម៉ោងបន្ថែមមានរបួស ខ្សែប្រយុទ្ធកំពុងឡើងជើង Giroud បានស៊ុតគ្រាប់ទី៤ ឲ្យកាំភ្លើងធំថែម១គ្រាប់ទៀតមុនបញ្ចប់ការប្រកួត ខណៈដែល Emre Can ទទួលបានកាតក្រហម (លឿង២ដង) នៅនាទី៨៤។

លទ្ធផលនេះ មានន័យថា ហង្សក្រហម Liverpool នឹងបាត់បង់ឱកាស Top 4 ដើម្បីបានកៅអីលេងChampions League រដូវកាលក្រោយហើយ ខណៈដែល កាំភ្លើងធំ Arsenal កំពុងតែឡើងជើងយ៉ាងខ្លាំង ដោយឈ្នះ១០ដង ក្នុងការប្រកួត១១លើកចុងក្រោយក្នុងលីក៕