កម្ពុជាទទួលបានមេដាយមាស៣ ប្រាក់៣ សំរិទ្ធ៥ ក្នុងការប្រកួតកីឡាប៉េតង់

ព្រឹត្តិការណ៍ប្រកួត​កីឡា​ប៉េតង់​ជើង​ឯក​អាស៊ីអាគ្នេយ៍​លើក​ទី ២ឆ្នាំ២០១៥ ដែល​​ប្រទេស​កម្ពុ​ជា​ធ្វើជា​ម្ចា​ស់ផ្ទះ ហើយដែលបានចាប់ផ្តើមប្រកួតកាលពីថ្ងៃទី៣មេសា មកនោះ បានបញ្ចប់​ហើយនាល្ងាចថ្ងៃទី០៤មេសានេះ​ នៅទីលានប៉េតង់ក្នុងពហុកីឡដ្ឋានជាតិ ។

លោក ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា បានអញ្ជើញចូលរួម​ក្នុងកម្មវិធីបិទការប្រកួត និងប្រគល់ពានជើងឯកដល់ក្រុមនិងកីឡាករ កីឡាការិនី ដែលទទួ​លបានជ័យលាភីនេះ ។

ចំពោះលទ្ធផល ក្នុងចំណោមប្រទេសចំនួន៧ ទាំងកម្ពុជាជាម្ចាស់ផ្ទះនោះ​ប្រទេស​ក​ម្ពុ​ជាបានជាប់ជាប្រទេសលេខ១ក្នុងការឈ្នះមេដាយបានច្រើនជាងគេដោយ បាន មេដាយ​ មាស៣ ប្រាក់៣ និងសំរិទ្ធ៥ ។ ប្រទេសបន្ទាប់​ពីកម្ពុជានោះ​គឺជាប្រទេសឡាវ​ ដែលបានមេ​ដាយមាស៣ សំរិទ្ធ១ ហើយប្រទេសដែលមានលំដាប់ លេខ៣ គឺប្រទេសសឹង្ហបុរី បានមេដា​យ​​ប្រាក់២ សំរិទ្ធ៤ ។ ម៉ាឡេស៊ី បានមេដាយសំរិទ្ធ១ ឯប្រទេសវៀតណាមនិងប្រ៊ុយណេ ពុំ​ទទួលបានមេដាយនោះឡើយ ។

ជាមួយនឹងលទ្ធផលនេះ សម្តេចតេជោហ៊ុនសែន នាយករដ្ឋមន្រ្តី​នៃព្រះរាជាណា​ច​ក្រ​​​កម្ពុជាបានប្រកាសផ្តល់ការឧបត្ថម្ភសម្រាប់ព្រឹត្តិការណ៍ប្រកួតនេះ ចំនួន ១០០ លានរៀល​។​ ក្នុងនោះ ផ្តល់ដល់កីឡាករ កីឡាការិនី​កម្ពុជា​ដែលចូលរួមក្នុងការប្រកួតនេះចំនួន៣១នា​ក់នោះ​ក្នុងម្នាក់ៗទទួលបាន២លានរៀលសរុប ៦២ លាន រៀល និង ៣២ លានរៀលទៀត ផ្ត​ល់អោយគណៈកម្មការរៀបចំការប្រកួត ។

សូមបញ្ជាក់ថា ព្រឹត្តិការណ៍ប្រកួត​កីឡា​ប៉េតង់​ជើង​ឯក​អាស៊ីអាគ្នេយ៍​លើក​ទី ២ឆ្នាំ​២​០​១៥ នៅកម្ពុ​ជានេះ មាន​ប្រទេស​ចំនួន៧ ទាំងកម្ពុជាម្ចាស់ផ្ទះចូលរួម ដែលក្នុង នោះ កម្ពុជាមានកីឡាករចំនួន៣១នាក់ វៀតណាម១០នាក់ សឹង្ហ​បូរី១៤នាក់ ប្រ៊ុយណេ០៧នាក់ ឡាវ១៣នាក់ ម៉ាឡេស៊ី១២នាក់ និងឥណ្ឌូនេស៊ី០៤នាក់ ​សរុប ទាំងអស់៩១នាក់ ៕