ខ្សែបម្រើរបស់ក្លិបបិសាចក្រហម Man Utdកីឡាករ Darren Fletcher បានចុះហត្ថលេខាលើកិច្ចព្រមព្រៀងរយៈពេល៣ឆ្នាំកន្លះជាមួយក្លិប West Brom។
កីឡាករវ័យ៣០ឆ្នាំម្នាក់នេះ បានបញ្ចប់ការផ្ទេររបស់គាត់ទៅក្លិប West Bromកាលពីយប់ថ្ងៃចន្ទ គឺបន្ទាប់ពីគាត់បានចុះហត្ថលេខាលើកិច្ចព្រមព្រៀងរយៈពេល២ឆ្នាំកន្លះ ជាមួយនឹងជម្រើសថែម១២ខែមួយផ្សេង និងក្នុងកិច្ចសន្យាមួយដែលអាចឲ្យគាត់អាចរកបានប្រហែលជា៦ម៉ឺនផោនក្នុង១សប្ដាហ៍។
សូមបញ្ជាក់ថា កីឡាករ Fletcherចង់ចុះហត្ថលេខាចាប់តាំងពីរាត្រីថ្ងៃសៅរ៍មកម្ល៉េះ ប៉ុន្តែកិច្ចព្រមព្រៀងមួយនេះ ត្រូវខកខានទៅវិញដោយសារតែក្លិបរបស់លោក Sam Allardyceចង់បានកិច្ចព្រមព្រៀងខ្ចីជើងជាជាងកិច្ចព្រមព្រៀងអចិន្ត្រៃយ៍។
កីឡាករ Fletcherបាននិយាយនៅលើវែបសាយរបស់ក្លិប West Bromថា លោកពិតជាមានអារម្មណ៍ត្រេកអរខ្លាំងណាស់ បន្ទាប់ពីអាចបញ្ចប់កិច្ចព្រមព្រៀងមួយនេះបានដោយជោគជ័យ និងទន្ទឹងរង់ចាំដោយអន្ទះសាបំផុត ចំពោះទស្សនីយភាពនៃការលេងឲ្យក្លិបថ្មីមួយនេះ។ លោកបានបន្តទៀតថា វាគឺជាជម្រើសដ៏ត្រឹមត្រូវមួយ ចំពេលវេលាដ៏អស្ចារ្យសម្រាប់អាជីពរបស់លោក ប៉ុន្តែលោកសូម្បីថ្លែងអំណរគុណយ៉ាងជ្រាលជ្រៅផងដែរ ដល់អតីតមិត្តរួមក្រុម Man Utdពិសេសគឺក្រុមអ្នកគាំទ្រតែម្តង៕
Post a Comment