ប៉ូលិស និង​ត្រាយអាស៊ី ឡើងវគ្គ ១/២ ផ្ដាច់ព្រ័ត្រ ខណៈ​អ្នកគាំទ្រចូល​មើលស្ទើ​បាក់ស្ដាត

ក្រុមការពារតំណែងជើងឯក ពានរង្វាន់ Hun Sen Cup រដូវកាលថ្មី អគ្គស្នងការដ្ឋាន នគរបាលជាតិ(ប៉ូលិស) និងក្រុមត្រាយអាស៊ី បានកក់កៅអីវគ្គពាក់កណ្ដាល ផ្ដាច់ព្រ័ត្រ(វគ្គ ១/២)ហើយ ក្រោយយកឈ្នះ គូប្រកួតរៀងៗខ្លួន ក្រោមការទស្សនាពីអ្នកគាំទ្រ រាប់ពាន់នាក់ កាលពីយប់ថ្ងៃទី៣១ ខែមករា ឆ្នាំ២០១៥ម្សិលមិញ ។

សម្រាប់ការបើកសម្ពោធ ពហុកីឡដ្ឋានខេត្តស្វាយរៀង នៃពានរង្វាន់សម្ដេចតេជោ ហ៊ុន សែន កាលពីយប់មិញនេះ មានអ្នកគាំទ្រយ៉ាងច្រើនកុះករ បានចូលរួមទស្សនា លើកទឹកចិត្តដល់កីឡាករ ប្រកួត ពោលគឺមិនចាញ់អ្នកគាំទ្រ ដែលធ្លាប់ចូលរួមទស្សនា ការប្រកួតក្នុងពហុកីឡដ្ឋានជាតិឡើយ ។

ជាលទ្ធផលក្នុងការ ប្រកួតជម្រុះវគ្គ ៨ក្រុមចុងក្រោយនោះ ក្រុមប៉ូលិស បានបំបាក់ក្រុម ជើងឯករងរដូវកាលចាស់ បៀលប្រាយយូណាយធីត ឲ្យហាលអាវ ក្នុងលទ្ធផលបច្ចេកទេស ៣-១ មុននឹងក្រុមត្រាយអាស៊ី ទម្លាក់ក្រុម Alberex Niigata PP ក្នុងលទ្ធផល ២-០ ។

ជ័យជំនះខាងលើ បានធ្វើឲ្យក្រុមប៉ូលិស និងក្រុមត្រាយអាស៊ី មានឱកាសឡើងទៅលេងវគ្គបន្ដ គឺវគ្គពាក់កណ្ដាលផ្តាច់ព្រ័ត្រ ប៉ុន្ដែត្រូវអង្គុយចាំអ៊ុតលទ្ធផល ២ប្រកួតទៀត នៅវេលាម៉ោង ៤រសៀលថ្ងៃទី០១ ខែកុម្ភៈ ឆ្នាំ២០១៥នេះ គឺមានក្រុមភ្នំពេញក្រោន ត្រូវប្រកួតជាមួយក្រុមម្ចាស់ផ្ទះខេត្តស្វាយរៀង និងក្រុមបឹងកេតអង្គរ ប៉ះក្រុមណាហ្គាវើល ។

ចាំមើលតើភ្នំពេញក្រោន និងបឹងកេត មានសំណាងអាចឡើងវគ្គ ១/២ផ្ដាច់ព្រ័ត្រដែរទេ បើខេត្តស្វាយរៀង និងណាហ្គាវើល ក៏ជាក្រុមខ្លាំងដែរនោះ? ការប្រកួតនឹងធ្វើឡើង នៅលើពហុកីឡដ្ឋាន ខេត្តស្វាយរៀងដដែល ៕