កីឡាករ Nani ជឿជាក់ថា រូបគេនៅមានអនាគតជាមួយក្រុម Manchester United ទៀត ទោះបីជាកំពុងស្ថិតក្នុងកិច្ចសន្យាខ្ចីជើងលេងឲ្យក្រុម Sporting Lisbon ពេញមួយរដូវកាលនេះក៏ដោយ។
ខ្សែបម្រើស្លាបជម្រើសជាតិព័រទុយហ្គាល់ ត្រូវបានលោក Louis van Gaal យកធ្វើជាថ្នូរមួយ ក្នុងការផ្ទេរយកខ្សែការពារ Marcos Rojo មកកាន់ក្រុមបិសាចក្រហម កាលពីដើមរដូវកាល ប៉ុន្តែរូបគេនៅជាប់កិច្ចសន្យាជាង៣ឆ្នាំទៀតនៅ Old Trafford។ Nani បានប្រាប់ដល់កាសែត Manchester Evening ថា៖ «ក្លិបយល់ពីតម្លៃរបស់ខ្ញុំ ហើយខ្ញុំដឹងថាពួកគេចង់ឲ្យខ្ញុំនៅបន្ត។ វាជាជម្រើសរបស់ខ្ញុំទេ ដែលត្រូវចាកចេញពីក្លិប ហើយវាជាជម្រើសដ៏ល្អមួយសម្រាប់រូបខ្ញុំ ព្រោះខ្ញុំដឹងថាបើខ្ញុំនៅបន្តក្នុងកីឡដ្ឋាន Old Trafford មួយរដូវកាលទៀត នោះវាពិតជាលំបាកសម្រាប់ខ្ញុំ»។
កីឡាករវ័យ២៨ឆ្នាំរូបនេះ បានបន្តថា៖ «ខ្ញុំគ្រាន់តែត្រូវការអ្នកដែលជឿជាក់លើខ្ញុំ និងជឿជាក់លើសមត្ថភាពរបស់ខ្ញុំ និងផ្ដល់ឱកាសសម្រាប់ខ្ញុំ ក្នុងការបង្ហាញខ្លួននៅលើទីលាន។ ខ្ញុំពិតជាសោកស្ដាយ ព្រោះតែ២រដូវកាលមុន ជាមួយក្រុម Manchester United ខ្ញុំមានបញ្ហារបួសរ៉ាំរ៉ៃជាច្រើន។ នេះជាឱកាសដ៏រីករាយមួយសម្រាប់ខ្ញុំ ព្រោះខ្ញុំតែងតែនឹកគ្រួសារ នឹកមិត្តភ័ក្ដិ និងចង់បានអ្វីថ្មីខ្លះៗ។ ប៉ុន្តែខ្ញុំនៅជឿជាក់ថា ខ្ញុំនឹងមានអនាគតបន្តទៀតជាមួយ Man Utd»។
សម្រាប់ប្រិយមិត្តវិញ គិតថា Nani អាចមានឱកាសពាក់ឈុតក្រុមបិសាចក្រហមទៀតដែរឬទេនារដូវកាលក្រោយ?
Post a Comment