ក្រុមបាល់ទាត់យុវជនឃុំគបានក្លាយជាជើងឯកក្នុងព្រឹត្តិការណ៍ប្រកួតពានរង្វាន់យុវជនខេត្តត្បូងឃ្មុំដែលបានរៀបចំការប្រកួតវគ្គផ្តាច់ព្រ័ត្រកាលពីម្សិលនៅទីលានបាល់ទាត់វិទ្យាល័យ ហ៊ុន សែនសួង ក្រុងសួង ខេត្តត្បូងឃុំដែលមានការអញ្ជើញចូលរួមជាអធិបតី និងឧបត្ថម្ភដោយលោក ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា។ កម្មវិធីនេះរៀបចំដោយសហព័ន្ធកីឡាសិស្ស និស្សិតកម្ពុជា រួមទាំងមន្ទីរអប់រំ យុវជន និងកីឡាខេត្តត្បូងឃ្មុំ។
ការប្រកួតក្រោមក្រសែភ្នែកអ្នកទស្សនារាប់រយនាក់សម្រាប់វគ្គផ្តាច់ព្រ័ត្ររវាងក្រុមយុវជនឃុំ គ និងក្រុមយុវជនមេមត់នារសៀលថ្ងៃអាទិត្យ ទី៤ ខែមករា ម្សិលមិញ កីឡាករ សាន់ សាលីម ជាអ្នកទម្លាយសំណាញ់ទីមុនគេឲ្យក្រុមយុវជនឃុំ គនាំមុខ១-០នៅនាទីទី១៥។ តង់ទី១ជិតចប់ទៅ ហើយកីឡាករលេខ១៧ សុះ ម៉ាត់ របស់ក្រុមយុវជនឃុំ គ រកបាន១គ្រាប់ទៀតដើម្បីនាំមុខ២-០ក្នុងតង់ទី១។
សម្រាប់តង់ទី២ ក្រុមទាំង២បន្តការប្រកួតយ៉ាងស្វិតស្វាញ ប៉ុន្តែមិនមានក្រុមណាមួយមានឱកាសបំប៉ោងសំណាញ់គូប្រកួតទេ ។ ចប់ការប្រកួត យុវជនឃុំគឈ្នះក្រុមយុវជនមេមត់ដោយលទ្ធផល២-០។ក្នុងពិធីប្រគល់រង្វាន់លោក ស៊ាន បូរ៉ាត រដ្ឋលេខាធិការក្រសួង អប់រំ យុវជន និងកីឡា និងជាប្រធានសហព័ន្ធកីឡាសិស្ស និស្សិតកម្ពុជាបានឲ្យដឹងថា ការប្រកួតនេះរៀបចំឡើងដោយមានគោលបំណងផ្តល់ឱកាសដល់យុវជនឲ្យបានជួបជុំគ្នា សាមគ្គីភាព មិត្តភាព ជំរុញការសិក្សា និងជាពិសេសបណ្ដុះវប្បធម៌កីឡាក្នុងខ្លួនយុវជន ព្រមទាំងអបអរសាទរទិវាជ័យជម្នះ៧មករា។ចំណាត់ថ្នាក់លេខ១ ក្រុមក្រុមយុវជនឃុំ គ ដោយទទួលបានពានជ័យលាភី១ ទង់ជ័យលាភី១ ថវិកា ២លានរៀល និងបាល់ចំនួន៦គ្រាប់ ។ ចំណាត់ថ្នាក់លេខ២បានទៅលើក្រុមយុវជនមេមត់ទទួលបានទង់ជយលាភី១ ថវិកា១លានរៀល និងបាល់ចំនួន៥គ្រាប់។ ចំណាត់ថ្នាក់លេខ៣បានទៅលើក្រុមយុវជនក្រុមយុវជនសម្ព័ន្ធគណៈកម្មាធិការសម្របសម្រួលនិសិ្សត បញ្ញវ័ន្តកម្ពុជាទទួលបានថវិកាចំនួន៦សែនរៀល និងបាល់ចំនួន៤គ្រាប់។ ក្រុមដែលមិនទទួលចំណាត់ថ្នាក់ទទួលបានប្រាក់ឧបត្ថម្ភ២សែនរៀល និងបាល់ចំនួន៣គ្រាប់ដែរ។
ការប្រកួតដែលរៀបចាប់ផ្តើមតាំងពីថ្ងៃទី២ ខែមករា ឆ្នាំ២០១៥មានក្រុមចូលរួមចំនួន៩ និងចែកចេញជា២ពូលគឺ ពូល«ក» មានក្រុមយុវជនរកាប្រាំ ក្រុមយុវជនមេមត់ ក្រុមយុវជនកៀនរមៀត និងក្រុមយុវជនកងពលលេខ២១ ខណៈពូល«ខ»មានក្រុមយុវជនវិទ្យាល័យសម្តេចតេជោហ៊ុន សែន ២ ក្រុមយុវជន ឃុំ គ ក្រុមយុវជន តោខ្មៅក្រុងសួង ក្រុមយុវជនទួលពន្លៃ និង ក្រុមយុវជនសម្ព័ន្ធគណៈកម្មាធិការសម្របសម្រួលនិសិ្សត បញ្ញវ័ន្តកម្ពុជា៕
Post a Comment