អ្នកលេងក្បាច់ចម្រុះកម្លាំងខ្លាំងវ័យក្មេង អ៊ំ ចំរើន បានបំបាក់ជើងខ្លាំងថៃឲ្យបោះបង់ការប្រកួតក្នុងទឹកទី៤ ខណៈអ្នកប្រើកណ្តាប់ដៃ ពេជ្រ សីហា បានត្រឹមស្មើអ្នកប្រដាល់ថៃ Lukchapachai សម្រាប់ការប្រកួតមិត្តអន្តរជាតិខ្មែរ-ថៃកាលពីយប់មិញនៅសង្វៀនបាយ័នស្ទឹងមានជ័យ។
ការប្រកួតលក្ខណៈអន្តរជាតិទាំងពីរពិតជាទទួលបានការចាប់អារម្មណ៍យ៉ាងខ្លាំងពីអ្នកទស្សនាដោយកីឡាករថៃទាំងពីរមិនមែនជាអ្នកលេងក្បាច់គុនសេរីធម្មតានោះទេ។ គូទីមួយអ្នកប្រើជង្គង់ឥតស្រមោលថៃ Kolab បានព្យាយាមវាយសម្រុកលើ អ៊ំ ចំរើន យ៉ាងខ្លាំងតាមរយៈជង្គង់ និងទាត់ ព្រមជាមួយនឹងការវាយកែងដ៏មុតស្រួចផងដែរ។ទោះជាអាវុធរបស់កីឡាករថៃម្នាក់នេះមើលទៅសាហាវគួរសម ប៉ុន្តែមិនអាចធ្វើព្យុះភ្លៀងលើអ្នកប្រដាល់វ័យក្មេងកម្ពុជាបានទេ។ ផ្ទុយទៅវិញ អ៊ំ ចំរើន វាយបានយ៉ាងល្អដោយកណ្តាប់ដៃ និងកែងផ្ទួនៗដែលបានធ្វើកីឡាករថៃបាក់កម្លាំងខ្លាំងរហូតដល់បោះបង់ការប្រកួតត្រឹមទឹកទី៤។ ជ័យជម្នះនេះផ្តល់ឲ្យអ៊ំ ចំរើនមានកំណត់ត្រាដ៏ល្អសម្រាប់ការប្រកួតលក្ខណៈអន្តរជាតិរបស់ខ្លួនលើកដំបូង។សម្រាប់ជើងខ្លាំងថៃ Lukchapachai មិនទទួលបានលទ្ធផលល្អប្រសើរដូចកាលមកអង្រួនសង្វៀនកម្ពុជាលើកដំបូងផ្តួលឯម ខ្លឹមខ្មៅ ក្នុងទឹកទី៣នោះទេ ប៉ុន្តែក៏មិនអាក្រក់ដែរសម្រាប់រូបគេដោយប្រកួតស្មើនឹងអ្នកប្រើកណ្ដាប់ដៃពេជ្រ សីហា។ ជើងខ្លាំងកម្ពុជារូបនេះពូកែវាយកណ្តាប់ដៃ ប៉ុន្តែលើកនេះចេញកែងរូសបានយ៉ាងល្អ ខណៈជើងខ្លាំងថៃព្យាយាមឡើងជង្គង់ និងទាត់។ ឆ្លងកាត់ការប្រកួតដ៏ស្វិតស្វាញទាំង៥ទឹក អ្នកទាំងពីរបានលទ្ធផលត្រឹមស្មើគ្នា៕
Post a Comment