Bale ៖ ស៊ុត២គ្រាប់ Assist ១ ជួយឲ្យវែល ឡើងឈរកំពូលតារាងពូល B

Gareth Bale បានក្លាយជាវីរបុរសរបស់ ប្រទេសវែល ក្នុងការប្រកួតវគ្គជម្រុះពានរង្វាន់ EURO 2016 ពូល B យប់មិញ បន្ទាប់ពីខ្សែបម្រើ Real Madrid រូបនេះ អាចស៊ុតបញ្ចូលទីលើក្រុមម្ចាស់ផ្ទះ អ៊ីស្រាអែល ២គ្រាប់ម្នាក់ឯង ថែមទាំង Assist ឲ្យ Aaron Ramsey ១គ្រាប់ទៀត ដើម្បីបញ្ចប់ការប្រកួតដោយគ្រាប់បាល់ ៣-០។

ក្រុមភ្ញៀវវែល លេងបានយ៉ាងល្អនៅតង់ទី១ ខណៈដែល Aaron Ramsey របស់ Arsenal បានតែតបញ្ចូលទីឲ្យវែល នាំមុខ ១-០ នៅចុងតង់នាទី៤៥ ក្រោយការតែតបញ្ជូនពី Bale។ ចូលដល់តង់ទី២ នាទី៥០ Bale មានឱកាសស៊ុតហ្វ្រីឃីក ជើងឆ្វេងបំប៉ោងសំណាញ់ទីគ្រាប់ទី២ បន្តទៀត។

ក្រុមម្ចាស់ផ្ទះកាន់តែយ៉ាប់យ៉ឺនថែមទៀត បន្ទាប់ពី Eitan Tibi ត្រូវពិន័យកាតក្រហម (លឿង២ដង) នៅនាទី៥១។ ក្រោយ អ៊ីស្រាអែល សល់គ្នាត្រឹម១០នាក់ វែល មានឱកាសវាយសម្រុកកាន់តែខ្លាំងទៀត ដោយកីឡាករឆ្នើម Gareth Bale ដដែល ជាអ្នករកគ្រាប់ទី៣ នៅនាទី៧៧។

ជ័យជម្នះមួយនេះ ពិតជាសំខាន់ណាស់សម្រាប់ក្រុមជម្រើសជាតិវែល ព្រោះពួកគេអាចទទួលបាន ១១ពិន្ទុ ឈរនៅលើកំពូលតារាងពូល B តែម្ដង ដោយលើក្រុមគូប្រជែង អ៊ីស្រាអែល ២ពិន្ទុ និងលើ ប៊ែលហ្សិក ៣ពិន្ទុ៕