អ្នកចាត់ការរបស់ក្លិបតោខៀវ Chelsea លោក Jose Mourinho ត្រូវបានសមាគមបាល់ទាត់ FA ផាកពិន័យជាប្រាក់ចំនួន២៥,០០០ផោន និងព្រមានចំពោះកាយវិការមិនត្រូវនាពេលអនាគត សម្រាប់អនុសាសន៍របស់គាត់ថា មានយុទ្ធនាការយ៉ាងច្បាស់ក្រឡែតប្រឆាំងនឹងក្លិបរបស់លោក។
អនុសាសន៍តវ៉ារបស់លោក Jose Mourinho បានកើតមានឡើងបន្ទាប់ពីក្រុម Chelsea ទាត់ស្មើជាមួយក្រុម Southampton កាលពីថ្ងៃទី២៨ខែធ្នូកន្លងទៅ។ទោះបីជាយ៉ាងណាក៏ដោយ គណៈកម្មការវិន័យឯករាជ្យរបស់ FA បានរកឃើញថា អនុសាសន៍របស់គ្រូបង្វឹកសញ្ជាតិព័រទុយហ្គាល់ម្នាក់នេះ បានធ្វើឲ្យប៉ះពាល់យ៉ាងខ្លាំងដល់ភាពស្អាតសំ្អរបស់ក្រុមមន្ត្រីការប្រកួត។FA បានប្រកាសឲ្យដឹងនៅក្នុងសេចក្តីថ្លែងការណ៍មួយថា បន្ទាប់ពីសវនាការរបស់គណៈកម្មការវិន័យឯករាជ្យរួចមកនោះ លោក Jose Mourinho ត្រូវបានផាកពិន័យជាប្រាក់សុទ្ធចំនួន ២៥,០០០ផោន ក្រោយពីគេរកឃើញថា លោកបានបំពានលើបទបញ្ជាផ្ទៃក្នុងរបស់ FA ពាក់ព័ន្ធនឹងសេចក្តីអធិប្បាយទៅកាន់សារព័ត៌មាន។លោក Mourinho ដែលគេបានរាយការណ៍ថា រកលុយបានយ៉ាងហោចណាស់១០លានផោនក្នុងមួយឆ្នាំ នៅក្នុងទឹកដី Stamford Bridgeនោះ រកប្រាក់ចំណូលបាន២៩,០០០ផោន ជារៀងរាល់ថ្ងៃ។
គ្រូបង្វឹកវ័យ៥២ឆ្នាំម្នាក់នេះ បានចូលរួមសវនាការផ្ទាល់ខ្លួន ក្រោយរងការចោទប្រកាន់ បន្ទាប់ពីការបង្កើតអនុសាសន៍របស់លោកជុំវិញយុទ្ធនាការប្រឆាំងនឹងក្លិប Chelsea គឺបន្ទាប់ពីកីឡាករ Cesc Fabregas ត្រូវបានគេចោទថាធ្វើពុត និងត្រូវច្រានចោលគ្រាប់បាល់ពិន័យប៉េណាល់ទីរួចមកនោះ៕
Post a Comment