ក្រុម Arsenal ទិញបានខ្សែការពារ Gabriel Paulista ពីក្រុម Villarreal ហើយក្នុងតម្លៃខ្លួន១៥លានផោន(២២,៤លានដុល្លារអាមេរិក)។ នេះបើតាមកាសែតនៅអេស្ប៉ាញបានចុះផ្សាយ។ 
កាសែតនៅអេស្ប៉ាញបានចុះផ្សាយថា ក្លិប Villarreal បានព្រមព្រៀងគ្នាជាមួយ Arsenal រួចរាល់ហើយក្នុងការផ្ទេរកីឡាករ Gabriel Paulista ក្នុងតម្លៃខ្លួនប្រមាណជា១៥លានផោនមកអង់គ្លេស។ ចំណែកឯថ្ងៃបង្ហាញខ្លួនជាផ្លូវការនៅ Emirates ខាងក្រុមលោក Arsene Wenger មិនទាន់បញ្ជាក់ឱ្យដឹងច្បាស់នៅឡើយទេ។ មួយវិញទៀតនោះ ក្រុមកាំភ្លើងធំត្រូវរត់ការរឿងសិទ្ធិការងារ (Work Permit) ទៀតសិនទើបអាចដាក់ឱ្យខ្សែការពាររូបនេះចូលលេងបានជាផ្លូវការ ព្រោះកីឡាកររូបនេះមានសញ្ជាតិប្រេស៊ីល។ ម្យ៉ាងវិញទៀត ទន្ទឹមនឹងការដោះដូរនេះដែរ ក្លិប Villarreal ក៏នឹងទិញយកខ្សែប្រយុទ្ធរបស់កាំភ្លើងធំម្នាក់វិញដែរ គឺកីឡាករ Joel Campbell ប៉ុន្តែមិនទាន់ដឹងច្បាស់ពីតម្លៃខ្លួននោះទេ។
ការពារកណ្ដាល Gabriel Paulista គឺជាកីឡាករដែល Villarreal ទិញពី Vitoria នៅឆ្នាំ២០១៣ ដែលកាលនោះមិនបានបញ្ជាក់ពីតម្លៃខ្លួននោះទេ គ្រាន់តែដឹងថារូបគេមានកុងត្រារយៈពេល៥ឆ្នាំជាមួយក្លិបនៅអេស្ប៉ាញមួយនេះ។ រយៈពេល២ឆ្នាំមកនេះដែរ កីឡាករវ័យ២៤ឆ្នាំរូបនេះចូលលេងបាន៤៩ប្រកួតប៉ុន្តែមិនបានរកគ្រាប់បាល់បាននោះទេ ៕
Post a Comment